పరశు వేటుకు మునుపు
రేణుక మనసు మోదము
మీ గాటి సంకెల త్రెంచిన
నాపై మీకేల కలుగదు?
నేటి నా అభ్రగమనము
మీరేసిన నిచ్చెన గాదె?
మీ స్థన్య రుణము
గూడుదాటు బలము కాదె?
నలుపు తెలుపుల భేదము
తెలుపు తనము వసను బట్టి
కర్ణ మధ్యమ బంధ ముక్తి
అక్షరాభ్యాసపు మొదలు కుడిపి
కరము వీడి సాగినడుగులకు
కరతాళ తాళ లయను కూర్చి
మీ నేర్పిన తాండవము గాదె
ఈనాటి ఈ నా ఠీ ప్రవృత్తి?
మీరు చేసిన నిర్వచనాలు
వితర్కించుట నాదు ధర్మము
తీరు చూపిన మీ శిక్షలు
అనుభవించుట నాదు ఖర్మము
పునాదినణుచుట ప్రకృతి ధర్మము
అది లేనిదే లేదు హర్మ్యము
పునాదినాగుట కాదు కార్యము
గొంగడి గాదె నాదు నైజము
మదినాపుట ఇకనసాధ్యము
మదిశూన్య బంధము బహు దుస్సహము
త్రికరణము కాని కార్యము
కాదు కాదు కానేరదు ఆమోదము
మీకు వెరువను
మడమ త్రిప్పను
రెప్ప వాల్చను
బాట మార్చను
వీపు మీకే
వేటు మీదే
తీర్పు మీకే
చేటూ ఓకే
ఫలమేమన్నది
ముందేముందని
ఎవడికెరుక
లేదు కోరిక
తోచిన న్యాయము
వీడను నేనిక
క్షమనేమాత్రం
వేడడు వీడిక.
No comments:
Post a Comment