ట్రావెలాగ్-2 స్లం డాగంటే సిగ్గెందుకు?

ఒంటరి పట్టాలు, పట్టాలు మధ్య
చిన్న పొట్లాం, పోట్లాంలో విస్తరాకు
విస్తరాకులో వదిలేసిన ఇడ్లీ ముక్క
విస్తరాకు చుట్టూ విసర్జితాలు......

చుట్టూ ఉన్న మనుషుల పట్టింపు లేదు
వెనుక బండి వస్తుందన్న భయమే లేదు
అర్జునుడిలా దృష్టంతా ఆ ఇడ్లీ ముక్క మీదే
దాన్ని పొట్టలోకి తోయడమే ధ్యేయం

ధ్యేయం సాధించిన కలియుగ విజయుడు
గుర్తించాడప్పుడు తా మనిషన్న నిజం
పక్కనున్న కుక్కతో పోటీ పడ్డ విషయం
పక్క చూపులు చూస్తూ కనుమరుగయాడు

డోకొచ్చినంత పనయింది చూస్తున్న మాకు
"డబ్బిచ్చినా తీసుకోరు" ఎవరివో మాటలు
ఎక్కడ చూపులు కలుపుతాడో అని
కింది చూపులు మావి కూడా....
"మానవత్వం" దిగంబరత్వాన్ని చూడలేక

శిఖండులెవరూ ఈ సమాజంలో?
చూస్తున్న వారా? మాటలన్న వారా?
డబ్బుండీ ఇవ్వని వారా?
లేక ఆ పార్థుడేనా ?.......

ఉన్నట్టుండీ హోరు....
"జయహో జయహో ..." అంటూ!
కన్నెత్తి చూస్తె గత ఎన్నికల పోస్టరు
"ఇండియా షైనింగ్" అంటూ!!

All rights of the image to those mentioned in http://vickyroyphotography.com/work/selected-works/. Used non commercially without permission.